Logo

जम्मू–कश्मीरमा अर्को विष्फोट, भारतीय सेनाका मेजर मारिए, भारत–पाकिस्तान सम्बन्धमा थप दरार

नयाँदिल्ली (एजेन्सी) – जम्मू–कश्मीरको पुलावमामा बिहीबार भएको आत्मघाति आक्रमणको दुई दिनपछि शनिबार भारत पाकिस्तान सीमा (एलओसी) नजिक एक विष्फोट भएको छ ।

विष्फोटमा भारतीय सेनाका एकजा मेजरको मृत्यु भएको भारतीय सञ्चारमाध्यमले जनाएका छन् । भारतीय टेलिभिजन आजतकको अनलाईन संस्करणले विष्फोटको कारण पत्ता नलागेको बताएको छ भने दैनिक भास्करले भारतीय जमिनमा राखिएको एक बारुदी सुरुङ डिफ्यूज गर्दा उक्त विष्फोट भएको बताएको छ । सो बारुदी सुरुङ आतंकवादीले राखेको दैनिक भास्करले दाबी गरेको छ । यद्यपी सो विष्फोटबारे थप विवरण दिइएको छैन ।

गएको बिहीबार श्रीनगर राजमार्गमा भारतीय सुरक्षाकर्मीको एक बसमा कारबाट आत्मघाति आक्रमण भएको थियो । सो आक्रमणमा कम्तिमा ४० जना भारतीय अर्ध सैनिक बलका जवानहरुको मृत्यु भएको थियो ।

दशक यताको सबैभन्दा घातक आक्रमण भनिएको सो आक्रमणपछि भारत र पाकिस्तानबीच सम्बन्धमा थप दरार आएको छ । भारतले सो आक्रमण पाकिस्तानस्थित जैश–ए–मोहम्मदले गराएको भन्दै पाकिस्तान सरकारले सो संगठनका प्रमुखलाई खुला छाडेको बताएको छ । उसले पाकिस्तानले आतंकवादीलाई आश्रय दिँदै आएको आरोप लगाएको छ । उता पाकिस्तानले भारतको त्यस्तो आरोपको खण्डन गरेको छ ।

बिहीबारको आक्रमणपछि भारतमा पाकिस्तानविरुद्ध सैन्य कारबाही गर्नुपर्ने आवाजसमेत उठेको छ भने भारतीय नेताहरुले उत्तेजक अभिव्यक्ति दिन थालेका छन् । जम्मू–कश्मीरको विषयलाई लिएर भारत र पाकिस्तानबीच ३ पटक युद्ध भएको छ भने सीमा क्षेत्रमा सँधै युद्धकै अवस्था जस्तो हुने गरेको छ ।

पाकिस्तानमा इमरान खान प्रधानमन्त्री बनेपछि यी दुई देशबीचको सम्बन्धमा सुधार आउने अपेक्षा गरिएको बेला बिहीबारको आक्रमणले त्यस्तो सम्बन्ध सुधारको आशालाई अनिश्चित समयका लागि पर धकेलिदिएको छ ।

लोकसभा चुनावमा होमिनै लागेको बेला भएको यो आक्रमणले एकअर्काप्रति आरोपप्रत्यारोपमा उत्रिएका भारतीय राजनीतिक दलहरुलाई एकै ठाउँमा ल्याइदिएको छ । सबैजसो दल र नेताहरुको स्वर एउटै खालको हुने गरेको छ । प्रधानमन्त्री नरेन्द्र मोदीले बदला लिने बताएका छन् । तर, भारतले कस्तो बदला लिने हो भन्ने तत्काल कुनै संकेत देखिएको छैन ।

तर, पाकिस्तानलाई अन्तर्राष्ट्रिय जगतबाट दबाब दिने प्रयास भने भारतले शुरु गरिसकेको छ । बिहीबारको आक्रमणपछि भारतीय विदेश मन्त्रालयले राष्ट्रसंघीय सुरक्षा परिषदलाई पत्र लेखेरै त्यस्तो प्रायस गरिसकेको छ ।

प्रतिक्रिया दिनुहोस्