एसीसी इस्टर्न रिजन टी– ट्वान्टी : नेपाल दोस्रो खेलमा पनि पराजित !

एसीसी इर्स्टन रिजन टी–२० क्रिकेट कपमा नेपालले लगातार दोस्रो हार व्यहोरेको छ ।थाइल्यान्ड क्रिकेट मैदानमा भएको आफ्नो दोस्रो खेलमा नेपाल हङकङसँग ४३ रनले पराजित भएको हो ।टस हारेर पहिलो ब्याटिङ गरेको हङ्कङले नेपाललाई १ सय ५५ रनको लक्ष्य दिएको थियो । तर, जवाफि ब्याटिङ गरेको नेपालले १८.१ ओभरमा १० विकेट गुमाएर जम्मा १ सय १० रन बनायो ।

ब्याटिङ कमजोर हुँदा नेपालले लगातार दोस्रो हार व्यहोरेको हो । हङकङविरुद्ध कप्तान ज्ञानेन्द्र मल्लले ४ चौका र १ छक्काको मद्दतमा ४६ रन बनाए भने कुशल मल्लले १९ रन अभिनास बोहराले १२ र आरिफ शेखले १० रन बनाउनु बाहेक अन्य खेलाडीले दोहोरो अंक जोड्न सकेनन् ।पूर्व कप्तान खड्का, उपकप्तान दीपेन्द्रसिह ऐरी, विनोद भण्डारी लगायत अनुभवी खेलाडीले सम्हालिएर ब्याटिङ गर्न नसक्दा नेपालले दोस्रो हार व्येहोरेको हो ।

यसअघि पहिलो ब्याटिङ गरेको हङ्कङले निर्धारित २० ओभर पुरा खेल्दै ६ विकेट गुमाएर १ सय ५४ रन बनाएको हो । नेपालविरुद्ध हङकङका निजाकत खानले सर्वाधिक ४८ रनको योगदान दिए । उनले ६ चौका २ छक्का प्रहार गरेका थिए ।

यस्तै, कप्तान मोहम्मद अजिज खानले २९ रन, हारोन मोहम्मद अर्सदले २७ रन र शाहिद वासिफले २६ रन बनाएका थिए ।नेपालका लागि स्पिनर सन्दीप लामिछाने र सुशन भारीले समान दुई–दुई विकेट लिए भने कुशल मल्लले एक विकेट लिएका थिए ।
हङकङविरुद्धको खेलमा नेपालका स्पिन बलरले राम्रो प्रदर्शन गर्दा पेश बलरले विकेट लिन सकेनन् । नेपालका लागि पेश बलिङमा करण केसी र अभिनास बोहरा थिए ।

यसअघि शनिबार भएको पहिलो खेलमा मलेसियाले नेपाललाई समान १ सय ५५ रनको लक्ष्य दिएको थियो भने नेपालले सबै विकेट गुमाएर मात्रै १ सय ३२ रन बनाएपछि २२ रनले पराजित भएको थियो ।

लगातार दोस्रो हारसँग अब एसिया कप क्वालिफायर पुग्ने सम्भावना घटेको छ । यद्यपी अंक गणितका आधारमा भने सम्भावना बाँकी नै छ । अब नेपालले थाइल्यान्ड र सिंगापुरसँग खेल्न बाँकी छ ।